منتديات ليب مون

لقد كانت جوزيل بفستان زفافها الأبيض ... جثة هامدة ... في وسط بقعة دماءٍ كبيرة ... بالرغم من ان الجثة كانت مفصولة عن رأسها الا انه كان من السهل لمهند ان يعرفها من فستان زفافها ...



ركع مهند على قدميه مصدوماً لما رأته عيناه فالفتاة التي كانت ستصبح زوجة اعز اصدقائه اصبحت مجرد ضحية .... للملثم قاطع الرؤوس ....

اما في الأسفل فكانت نيران ما زالت في مكانها حتى سمعت ذلك الصوت يناديها من خلفها ....

الصوت : نيران !!

نيران تلتفت ورائها لترى فتاة ً ترتدي عبائة بيضاء كانت اشبه بالملاك ...

نيران : جوزيل ؟؟!


نعم لقد كانت تلك الفتاة جوزيل ... لكن كيف ؟؟ ...

جوزيل : نيران ، الملثم ... الملثم لازم يدفع ثمن يلي عمله ....

نيران : انا ما فاهمي !!

يأتي صوت مهند من بعيد : نيران !!

تلتفت نيران لتجيب ...

نيران : مهند !!

تلتفت نيران خلفها لتجد ان جوزيل او شبحها قد اختفت ...

نيران : ( لنفسها ) مو معقول !!



مهند ينزل عن الدرج ... ينظر الى نيران بحزن ...

مهند: نيران ! في ضحية جديدة ...

نيران : شو ؟

( تدمع عينيها وتلتفت خلفها )

جوزيل ؟؟ مو هيك ؟؟



يهز مهند برأسه لها متأسفا ً...
يخرج مهند ونيران ... ينطلق مهند نحو فريق التحري ... اما نيران فتتجه والدموع في عينيها نحو نادية ...

نادية : نيران حبيبتي ما شفتي جوزيل ؟؟

نيران : نادية انا آسفة

نادية : شو بكي شو هالدموع ؟ ليش عم تبكي ؟؟

نيران : جوزيل ... جوزيل ...

نادية : ( بقلق ) شو بها جوزيل ؟؟

نيران : الملثم قطع ...

نادية : لأ ما تكملي مو معقول مو جوزيل ...

نيران : نادية !



نادية : ( تصرخ باكية ) مو جوزيل ، مو جوزيل ...

نيران تعانق نادية التي اخذت تبكي بألم على صديقتها الغالية ....

في القصر :

اخذت رؤى و باقي الفريق يفحصن الغرفة ... دخل العقيد مروان ...

مهند : شو صار ؟؟

مروان : يبدو انو والد العروس والعريس اختفوا ... للأسف الفريق دور بكل مكان بدون نتيجة

مهند : ( بغضب ) شو يعني الأرض انشقت وبلعتهن ؟!

مروان : بعرف انك شاكك انو لويس هو القاتل ، وبعرف انو من اعز اصدقائك ، بس اختفائه بأكد شكنا بأنه يمكن يكون القاتل كمان ما تنسى انه هو آخر شخص قابل الضحية ...

رؤى : مهند ، انتَ متأكد انك شفت الملثم ؟؟



مهند : ايه بس انا متأكد انه مو لويس ...

هشام : وليش متأكد ؟؟

مهند : شو نسيت الرصاصة يلي بكتفه ؟؟ كمان لما نيران شافت الملثم بالجريمة الأولى كان لويس و جوزيل وابوها بالصالة وفي عندك الآف الشهود على كلامي ...

ميس : حضرة العقيد ، كلام مهند مقنع ...

رؤى : بس اذا ما لويس ولا ابو جوزيل لكان مين الملثم ؟؟

هشام : السؤال هوي وين اختفوا ؟؟



مهند : هيدا اللغز يلي لازم نحلو ...


يدخل احد الضباط يلقي التحية على العقيد مروان ويناوله الملف ...

رؤى : ملف البصمات مو هيك ؟؟

مروان : مزبوط ، الضحية الأولى اسمها ارميدا نابليوس يبدو انها ... ( تقاطعه نيران )

نيران : ( تنظر الى الجثة ) مخرجة فيلم فيردي عام 2000 وحصلت على جائزة احسن مخرجة عالمية في عام 2003 ...

رؤى : نيران ؟؟

نيران تبعد نظرها عن الجثة وتنظر الى رؤى ثم الى العقيد مروان)

بس المفاجأة انه ارميدا نابليوس انقتلت مبارح على ايد عصابة في محاولة لإغتيلها بعد ما صورت فيلم وثائقي عن مدمنين المخدرات في كوبا ، وجابوا جثمانها لروما عشان تندفن بمسقط رأسها ...


مهند : يعني ...

نيران : يعني في شخص نبش جثتها و اوهم الكل انها ضحية من الحفلة ... وما كان رح يصعب عليه هيك شي لأنو الجثة ما صرلها يومين وبما انها كانت موجودة ببراد الموتى فاكيد ما رح تتحلل بسرعة ....

هشام : نيران انتي من وين بتعرفي هالمعلومات ؟؟

نيران : شو نسيت انو انا كمان طالبة اخراج ؟؟

هشام : مزبوط

مروان : وهلأ شو رح نعمل ...

مهند : يعني الجريمة الأولى كانت عملية الهاء مو اكتر ليتمكن من ...

رؤى : جوزيل ؟!

مهند : ( بعصبية ) ما اغباني

نيران : في شي تاني

رؤى : شو بعد في ؟؟

نيران : بعرف انكن رح تفكروني مجنونة بس انا عنجد ما كنت عم هلوس

رؤى : نيرا شو في ؟؟

نيران : بالوقت يلي كشف مهند جثة جوزيل انا شفتها

الجميع : شو ؟!

مهند : كيف ؟

نيران : ما بعرف اذا كنت شفتها هيي او ...

مهند : او شو ؟؟

نيران : شفت شبحها ...

رؤى : نيران هلأ ما وقت مزح

نيران : عنجد ما عم امزح

مهند : ايه كملي

هشام : شو تكمل هلأ انتَ مصدق هالحكي ؟؟

مهند : نيران كملي ...

نيران : كانت لابسة عباية بيضاء ، ونبهتني من الملثم ...

مهند : لويس ؟؟

نيران : ما بعرف قالتلي لازم يدفع ثمن يلي عمله ...

مهند: هلأ فهمت كل شي ...

رؤى : شو يلي فهمته

مهند : حليت اللغز

مروان : كيف؟

مهند : مو مهم كيف المهم نلحق الضحايا يلي بقيو ...


نيران : ضحايا

الجزء الثاني :


يتجه الجميع الى الحديقة حيث كان جميع الحضور ينتظرون نتيجة التحقيق ...



نادية : ( لميسون ) انا مو مصدقة

ميسون : حبيبتي ما تعبي حالك اذا مو عشانك عشان الطفل يلي ببطنك ...

نادية : انا ما مصدقة انها ماتت بهالطريقة المتوحشة بليلة عرسها ...

ميسون : معك حق الله يرحمها

يخرج مهند وهو يصرخ عالياً ...

مهند : اللعبة انتهت ... انتهت اللعبة يا جوزيل ... انتهت

ينظر الجميع الى بعضهم البعض ...

رؤى : جوزيل !! شو إنجن الصبي

هشام : اكيد الجرح أثر على عقله ...

نيران : ( تبتسم ) كنت متأكدة انه في شي غلط

رؤى : شو يعني ؟؟

نيران تقترب من مهند ...

نيران : جوزيل ! ممكن تخدعي كل الحضور بس مستحيل تخدعي طالبة اخراج ... الخدع يلي استخدمتيها بالفعل ذكية بس مو لوحدة بتعرف فنون الخدع السينمائية ...

نادية : يعني جوزيل عايشة ... بس كيف ؟؟ الجثة ؟!

فجأة يأتي صوت من بعيد ... :

جثة نيهار

يلتفت الجميع الى مصدر الصوت وكان و اذا به والد جوزيل ...

مهند : أنتَ ؟؟ نيهار ؟!

الوالد : نيهار بتكون بنتي الثاني ...

مهند : قصدك توئم جوزيل

نادية : توئم ؟!!

الوالد : كنت عارف انك رح تحل اللغز يا ابني ...

مهند : انا مو ابنك ... ما بقبل انو ابي يكون شريك بجريمة قتل ...

الوالد : ( يضحك ) شريك ؟؟( يصرخ بعصبية ) انا الضحية !!

مهند : لأ ،هيدي خدعة لتبرر جريمتك ... وين لويس ؟؟

الوالد : ما بعرف عن شو عم تحكي ؟؟

يأتي الصوت من بعيد ...


الصوت : عم يحكي عن الجريمة يلي ارتكبتها ...

كان ذلك الصوت صوت جوزيل التي خرجت من القصر بعبائتها البيضاء تمسك بيد لويس ...
والجميع ينظر اليهم بدهشة ....

نادية : جوزيل؟! كيف؟؟

جوزيل : القدر

الوالد : انا بريء ما عندكن دليل ضدي

مهند : ( بسخرية ) انت غلطان ...

الوالد : ( بارتباك ) شو ؟؟

مهند : نيران بتتذكري الشاب يلي تحرش فيكي بالحفلة ؟؟

نيران : ايه بس شو علاقته بالجريمة ؟؟

مهند : ما هوي اصلاً اساس الجريمة ... اكيد مو معقول انه نيران تصدق قصة شبح جوزيل لانها عندها خبرة بالخدع والتمثيل ويبدو انه جوزيل من طريقة كلامها مع نيران كان قصدها تتهم شخص ثاني عشان تبعد التهم عن لويس عشان هيك ما ذكرت اسم الملثم ....

بكل بساطة هلأ فهمت ليش لويس اصر على اني اجي عالحفلة كان بدو يتأكد من انو خطتك كلها رح تنكشف ...

لويس: مزبوط ، انت الوحيد يلي بوثق فيه

الوالد : انا ما فاهم شي عن اي خطة عم تحكي ؟؟

جوزيل : مهند انا رح احكي ...

نيهار بتكون اختي التوئم يلي ما كنت بعرف بوجودها الا من اسبوع تقريباً

يبدو انو بابا خلال السنين يلي مضت كان بيشتغل بالأعمال الممنوعة وهيك قدر يكون هالثروة كلها بوقت كتير قصير ... بدكن تسألوا كيف عرفت ؟؟

لويس : انا يلي خبرتها من خلال عملي بشركة بيها قدرت اكتشف كل اعماله الغير شرعية ... و لما قررت اعترف لجوزيل بالبداية ما صدقتني لحد ما ...


جوزيل : لحد ما اجت اختي التوئم عالقصر ، نيهار !!بس بعترف اني ما كنت مبسوطة بشوفتها ، لما كنا صغار انفصل بابا عن امي بعد ما اكتشف انها كانت عم تستغلوا لتسرق ثروته بالرغم انه ما كان عنده هالثروة يلي بتستاهل وقرر بعد إنفصالهن انه نيهار تعيش مع امها وانا اعيش معه ... بس خطتك يا بابا ما نجحت بعد ما ماتت ام نيهار ... لأنها اعترفت بكل شي لنيهار يلي اجت عالقصر تهددك ...فلوسك مقابل سكوتها عن هويتها والا بتفضحك بيوم عرسي، طبعاً بعد ما حققت مركزك المرموق ما كانت رح تكون حلوي انه الناس يعرفوا انه عندك بنت من الطبقة الفقيرة ... فطلبت منها تيجي عالحفلة ووعدتها انه بعد الحفلة رح تدفعلها كل يلي بتتمناه وقتها صرت تخطط لتتخلص منها ...

مهند : وظفت قناص محترف ... الملثم ، نفس الشاب يلي كان بالحفلة ....


نيران : ( مندهشة ) الشاب يلي تحرش فيي ...

مهند ينظر الى نيران ) مزبوط !!

يركع الوالد على الارض ....

الوالد : كيف عرفت ؟؟

مهند : بعترف انه بالأول ما اجا على بالي بس بعد ما واجهته بالغابة قدرت اكشفوا كيف بدي انسى الطريقة المحترفة يلي هاجمني فيها طريقة واحد قناص نفس الطريقة يلي هاجمني فيها بالصالة ... وكمان اختياره لمهاجمتي بالغابة بدلاً من رؤى بيثبت حديثي ، يعني بصراحة الواحد لما يشوف صبية وشاب اكيد بدو يهجم عالصبية قبل الشاب لانها دائماً تعتبر اضعف واقل قوة بس هوي اختار العكس لينتقم مني ...


رؤى : عنجد شو ؟؟ (بغضب )

مهند : ايه بس هالصبية علمته درس ولولاها كان راسي مفصول عن جسمي ...

رؤى : ( بفخر ) ايه هيك صلحها

مهند : هاي كانت تاني غلطة بيرتكبها ...

نادية : والغلطة الأولى ؟؟

نيران : أنا

الجميع متفاجئ ...

نادية : انتِ ؟؟

نيران : كان عم يحاول يشغل الجميع بالجريمة الأولى ليقدر ينفذ جريمته التاني قتل نيهار ببساطة قدر يأمن الجثة الأولى بس كان لازم حدا يكتشف الجريمة ...

مهند : وهيك طلب ابوك يا جوزيل من الخادمة تشوف عامل الصيانة وهيك انكشفت الجريمة الأولى و التهى الناس بالبحث عن الملثم بس ما خطر ببالن انه رح يفوت عالحفلة وينفذ الجريمة التاني بشخصيته الحقيقية بدون اي تنكر لانه عارف سلفاً انه ما حدا رح يتوقع ان الملثم رح يدخل عالقصر بدون تنكر فكان لازم يهرب عالغابة يغير ثيابه بسرعة ليقدر يدخل على الحفلة وينفذ جريمته التاني ...التخلص من نيهار يلي كانت موجودة بالغرفة الأخيرة من الطابق الثاني .... بس لسوء الحظ وقتها مرت سيارة الضابط رؤى وبالرغم من هالشي ما قدرنا نمسكه ... هيك قدر يغير ثيابه ويفوت عالحفلة وينفذ الخطة ... تفاجأت نيهار لما شافته حاولت تصرخ بس للأسف ما قدرت تنجو .... كان لويس و جوزيل وقتها بالقصر عم يتحدثوا بالمكتب الموجود بجانب الغرفة ...

جوزيل : سمعت نيهار عم تتوسل القناص .... وبعدها عم الهدوء

لويس : كان لازم شخص يدفع الثمن ... لما دخلنا الغرفة وشفنا منظر الدم ... وقتها بس

جوزيل : ( تبكي )عرفت انو ابي لازم يحس بالذنب طيلة حياته ...

نيران : غيرت ثيابك ولبستيهن لجثة نيهار ... و بعدين لبست عباية بيضة كانت خطتك انه بيك يشوفك شبح
مو انا ، مو هيك ؟؟

جوزيل : مزبوط كنت لازم حسسوا بالجريمة يلي عملها ... بس للأسف القناص غير ثيابه كان لازم يطلع من القصر على هيئة الملثم عشان ما ينكشف امره وقتها انا ولويس هربنا للجهة الثاني من القصر ... الجهة المهجورة ...

مهند : ( يبتسم ) وقتها اجينا انا ونيران وخربنا الخطة كلها ... لما شفت الجثة افتكرتها انتِ ...

جوزيل : وقتها شفت نيران وقلت انه ما في الا هالحل ، نيران رح تعرف اني مو شبح فرح تستوعب انه في شي غلط ، انه في خدعة وقتها نبهتها من الملثم و هربت ...

( تنظر الى والدها )

و أكيد بابا دخل القصر وقت ما مهند ندالك وخبرك باني انا يلي متت ، وقتها خاف بابا واختفى ... والبقية بتعرفوها ...

( ينظر الجميع الى بعضهم فلقد كشفت اخيرا الحقيقة ولكن تبقى حلقة مفقودة اين هو الملثم او بالأحرى قاطع الرؤوس )

فجأة تسقط على يد نيران بقع من الدماء ...


نيران : ( تنظر متوترة الى يديها )

شو هيدا ؟؟

مهند : ( ينظر بخوف اليها ويصرخ ) نيران !!

ينزل الملثم الذي كان ينزف من فوق الشجرة .... يحمل سيفه ويوجهه نحو عنق نيران ...

البنات : نيران !!

الجميع مندهش فأخيراً ظهر الملثم للعلن لكن هل ستكون نيران آخر ضحياه ؟؟

فريق التحري يوجه مسدساتهم نحو الملثم ....

مهند : اتركها

نيران : ( تستنجد ) رؤى ؟؟


رؤى : اتركها

الملثم : نزلوا المسدسات او بفصلكم راسها عن جسمها هيي مو احسن من يلي سبقوها ...

مهند : اذا بتمس شعرة وحدي منها ...

الملثم : شو رح تعمل ؟؟؟ يعني ، هلأ الكرة بملعبي وانا يلي بقرر ...

هيام : احنا مستعدين نعطيك يلي بدك ياه بس اتركها

نيران : ( للملثم ) افلتني يا حقير

الملثم : ( يضحك بسخرية ) اسف يا آنسة نيران بس انت ورقتي الرابحة ... عم اقول نزلوا المسدسات
ينزل الجميع مسدساتهم ما عدا رؤى ومهند ...

هشام : رؤى !!

رؤى : مستحيل

نيران : رؤى الحقيني

رؤى :

(خائفة ، عاجزة عن اتخاذ القرار)

نيرا !!

تنزل رؤى مسدسها بهدوء ....

الملثم : برافو ، ( ينظر الى مهند ) وهلأ دورك يا بطل نزل سلاحك ...

مهند : ( بسخرية ) بأحلامك !!

ينظر الجميع الى مهند باندهاش ....

نادية : مهند نزل سلاحك ، نيران !

مهند : ما تخافوا مستحيل يقتلها زي ما قال ما هي الورقة الرابحة بيعرف انه مصيروا متعلق بحياتها

جوزيل : (تنظر الى مهند بابتسامة) نيران ! ما تخافي

الملثم : اذا هيك بفضل اني ما موت لحالي رح عد يا الثلاثة اذا ما بتنزل المسدس انا رح اذبحها ويلي بدو يصير يصير ...

1
رؤى : مهند !!

الملثم : 2 ...

الصبايا : نيران !!

الملثم : ثلا ...

فجأة يعلو صوت الرصاصة ويصرخ الجميع خوفا على نيران ...

مهند : نيرااااااان !!!

ولكن لم تكون نيران من اصيبت بل اخترقت احد الرصاصات صدر الملثم ... يسقط الملثم أرضا ً ويفارق الحياة ... تنظر نيران خلفها لتجد من صوب الرصاصة على الملثم ... يتفاجأ الجميع ...

نيران : مستحيل انتَ !!

جوزيل : بابا !!

يعيد مهند المسدس الى جيبه ... تركض الفتيات نحو نيران المصدومة ... اما مهند فتوجه نحو والد جوزيل واعتقله ...

مهند : بس انا مو فاهم ليش ؟؟

الوالد : هلقد بكفي ! اسمعني يا ابني ما تتخلى عن الشخص يلي بتحبه شو مصار

( ينظر مهند لنيران التي كانت مرعوبة ) ...

جوزيل : بابا ؟؟

الوالد : سامحيني يا بنتي ... لويس دير بالك عليها ... ما بدي وصيك

لويس : اتطمن رح اعرف احميها من امثالك ...

نيران : ( تنظر الى الملثم ) ليش ؟؟

هيام : نيرا انتِ منيحة ؟؟

نيران : ايه انا منيحة ...

( تقترب من هيام تعانقها )

نادية تتجه نحو جوزيل ... تعانقها

نادية : آسفة على يلي صار

جوزيل : انا يلي آسفة كل هيدا صار بسببي

نادية : لأ ما تقولي هيك ؟؟

يأخذ فريق التحري والد جوزيل الى سيارة الشرطة ويحملون جثة القاتل لتنتهي اسطورة قاطع الرؤوس للأبد...

يدخل الجميع الى داخل القصر ....

جوزيل : هلأ شو رح نعمل ...

لويس : رح نكمل عرسنا

جوزيل : بصير ؟؟

نادية : وليش ما بدو يصير ؟؟

لويس : حبيبتي هيدا قدرنا

جوزيل : نادية ممكن تكوني اشبينتي ؟؟

نادية : بعد يلي صار ما بظن بس بعرف وحدي بتقبل تكون اشبينتك ..

جوزيل : مين ؟؟

نادية : مين غيرها ، نيران !!

مهند يقترب من نيران ...

مهند : كيف صرتي ؟؟

نيران : شو رح يصير هلأ ؟؟

مهند : ابو جوزيل خبرنا بمكان رووس الضحايا ... نيران انا آسف

نيران : على شو ؟؟

مهند : عرضت حياتك للخطر

نيران : اذا هيك ما كتير تزعل اصلاً انا دايماً منحوسة ، شي عادي

يرن هاتف لويس :

لويس : اهلاً ، لأ ما تخافي كل شي منيح ايه امسكنا القاتل ايه لحظة بس ...

يذهب لويس باتجاه مهند ...

لويس : تفضل يا سمو الأمير مهند ...

نيران : شوو؟؟!

لويس : شو ما بتعرفي انه مهند بكون ... ( يقاطعه مهند )

مهند: بلا مزح هلأ بتصدق روح من هون (يدفعه بيديه و يشير له باصبعه ليصمت )

لويس : حاضر ، تفضل جينا !!

مهند : جينا؟!

لويس : شو بتحب ناديلها بلقبها ( يضحك )

مهند : لأ جينا بتكفي يلا باي

لويس : باي

مهند : الو ، ايه ماما

الملكة جينا : شو وينك ؟ ليش بعدك ما رجعت عالقصر صرنا الفجر يا ابني ...

مهند : معلش ماما ،انا ما رح اقدر ايجي اسا

الملكة جينا : بس بدي افهم انتَ ليش تأخرت مو قبضت على المجرم ؟!...

مهند : لما ارجع بحكيلك كل شي ،ما تقلقي يلا باي

الملكة جينا : باي ( يقفلان الخط )

نيران : جينا !...

مهند : اسم امي

نيران : يا ترى وين سمعت هالإسم قبل هالمرة ...

مهند : شو ما في بروما كلها الا جينا وحدي

نيران : معك حق

تقترب جوزيل و نادية من نيران ...

جوزيل : نيران ممكن اطلب منك طلب

مهند : ( يهمس لنيران ) الله يستر

جوزيل : سمعتك

نيران : اكيد بس شو ؟؟


جوزيل : ممكن تكوني اشبينتي ؟؟

نيران : اشبينتك ؟؟

نادية : نيرا ايه حبيبتي ما فيها شي ...

نيران : بس...

مهند : بس شو ؟؟

نيران : لأ مستحيل بصيروا الناس يتفرجوا علي انا بخاف

مهند : ومن شو بتخافي كمان انا رح كون معك شو نسيتي اني اشبين لويس ...

نيران : لأ لأ ما بقدر

نادية: نيران كرمال جوزيل كمان ما في حدا غريب الا احنا الفريق والبنات يعني من شو خايفي؟

نيران : بس...

جوزيل : ايه بس كمان هيدا اخر طلب بطلبه منك انا ولويس رح نسافر بكرا على اميركا وقررت اني استقر هونيك عشان ننسى الماضي الأسود ، بليز حققيلي طلبي الأخير ...

نيران : اووووووووف طيب انا موافقة

مهند : ( يسعل) الله يستر

ينظر الجميع اليه مبتسمين ...

في الكنيسة :


تدخل العروس وتمشي في الممر خلفها اشبينتها نيران وترمى الزهور عليهما ... يمسك لويس يد جوزيل ويتوجهان نحو الكاهن اما نيران فوقفت الى جانب مهند ، تبدأ مراسم الزواج ....

لويس : انتِ حياتي طبعا بقبل ...

.....

جوزيل : ايه انا بقبل


.....

وبعد ان اعلن الكاهن زواجهما ... اجتمعت الفتيات للإمساك بباقة الزهور

ميسون : رؤى قومي نمسك باقة الورد

رؤى : عنجد شو ناقصني هيك خزعبلات ...

ميسون : انتِ حرة ، هيام ؟؟

هيام : لا حبيبتي شو مفكريتني صغيرة

ميسون : وانتِ ست ياسمين ؟؟

ياسمين : بقوم ليش لأ يعني ..

مهند ( لنيران ) : امشي

نيران : لوين ؟؟

مهند : شو لوين بدنا نمسك باقة الورد

نيران : ايه امسكها انتَ يعني هلأ من بين كل هالصبايا ما حدا حيلقطها غيرنا

مهند : كل شي ممكن يصير

نيران : بس ...

يسحبها من يدها ويتجهان لإلتقاط باقة الزهور ...

تقف الفتيات متحمسات للإمساك بالباقة اما جوزيل فكانت تقف في الأمام مستديرة .....

وأخيرا ترمي جوزيل باقة الزهور تصرخ الفتيات محاولات الإمساك بها ، تنظر نيران الى الباقة مبتسمة يلمح مهند تلك الإبتسامة الجميلة ... فلقد ادرك رغبة نيران بالحصول عليها ....

نظر مهند الى الباقة نظرة ساحرة ....... فجأة تسقط باقة الزهور بين ذراعي نيران ... تندهش نيران

لويس ( لجوزيل ) : يبدو انه مهند وقع !! ( تضحك جوزيل )



ميسون : مو معقول ( بحزن )

ياسمين : والله شكلها نيران رح تتجوز قبلنا ( تضحك )


ينظر مهند لنيران التي كانت متفاجأة بشدة فيبتسم لها و تبتسم هي بدورها له ...

betjani hal nihaieh allah ye3tiki l 3afieh
akid niran hieh a7la cha5sieh w mouhanad kaman 7aboub
teslam dayatek

شكرا حبيبتي وبتمنى يكون في جزء ثاني عشان نعرف اذا نيران رح تعرف هوية مهند واذا نادية حتجيب صبي او بنت واذا رامز رح يرجع لهيام واذا واذا يعني في احداث واستفسارات كتير متشوقين لنعرفها بس ان شاء الله اذا نزلوا الجزء الثاني رح نزل بقية القصة ....

مفاجأة سارة لمحبي بنات روما سيفتح موضوع خاص عن بنات روما في القسم العام تحت اسم ( مذكرات بنات روما ) سيتم عرض قصص الحلقات لاستعادة تذكرها قبل عرض الجزء الثاني ولكي يتمكن الجميع من متابعة هذا المسلسل الشيق رأيت انه من الأفضل وضعه في القسم العام .

هااااااااااااي انا شاب من سوريا ممكن تقبلوني صديق معكم

اهلا فيك صديقي طبعا بنرحب فيك نورت الموضوع